نحب نعيش

عسلامة أنا بنية عمري 24 سنة من عايلة محترمة و محافظة ، حكايتي بدات ملي أنا صغيرة في عمر 6 سنوات أكاكا تعرضت للتحرش من 3 عباد ، راجل كبير يخدم في عطرية كان ديما يدخل يدو و يلامس أعضائي التناسلية برشا مرات عملها ، و لد عمي مرا عرا روحو قدامي أما ما مسنيش و بنت خالتي كانت ديما تبدى تداعب في أعضائي التناسلية برشا مرات عملتها و أنا بطبيعة هذا الكل محكيتو لحد إلى يومنا هذا ، دارنا كانو صعاب و أنا صغيرة نخاف نحكي ، اليوم و أنا في العمر هذا نحس روحي معنديش قيمة ، معندي حتى دور في الحياة رغم نقرى متفوقة و عايلتي يحبوني برشا حتى صحابي زادا ، أنا كيف نبقى و حدي يهبط عليا اليأس و الحزن و المشاعر السوداوية لكل و نولي نتفرج في الpornographie رغم أني و الله منحبش نتفرج في الحقيقة أما نلقى روحي كل ما نقرر نبطل منجمش و نرجع نتفرج يجي 3 سنين و أنا نتفرج موش ديما مرات نبقى حتى شهر ولا أكثر منتفرجش أما بعد نرجع نتفرج ، نحس حياتي فارغة مفماش شكون يملالي و قتي ، أنا إنسانة منحسش طعم الفرحة و منجمش نبكي نبدى نحاول في روحي باش نهبط دمعة رغم إني كنت إنسانة حساسة و دمعتي قريبة مازلت حساسة أما دمعتي ولات بعيدة برشا زادة ، أنا ديما نتظاهر بالصلابة أما أنا في الحقيقة نحب نتخبى مالعالم الكل ، نظهر قوية أما أنا من داخل هشة و أقل كلمة و لا حاجة تأثر فيا ، معنديش القدرة إني نخرج ولا نعمل سبور و لا حاجة ، حتى حاولت ندخل في علاقة عاطفية منجحتش لي نحكي معاه نلقاه يلعب و أنا إنسانة فيسع نتعلق نخاف يمشي و يخليني نولي نقول خليني وحدي خير ( كنت مع شكون عام الباك و هو مشى و خلاني بقيت واحلة في الحكاية ما تجاوزتها كان بعد 3سنين ) عندي عام توا نعدي عند طبيبة نفسية و تعطي فيا في الدواء نحسها متحبش تقلي شعندي بضبط و أنا منجمتش نسألها ما نعرفش علاش يمكن خايفة الدواء لي نشرب فيه توا اسمو "zolen" رتحني شويا من الأحاسيس الخايبة أما مزال عندي برشا ، أنا الطبيبة نمشيلها ببرشا حكايات كي نوصل بحذاها ننساهم ، هي باهية و تعرف حالتي أما أنا منعرفش علاش منيش مرتاحة برشا معاها نحسها متفهمنيش برشا و متفسرليش لي نحب نفهمو أما منجمش نبدلها خاطر هي الوحيدة لي تعرف حالتي سامحني دكتور كان طولت عليك و بربي عاونني 🙌