مدمن على الزطلة او منحرف نرجسي ؟

علاقة خايبة، عرك على اتفه الاسباب، منعرفش منحرف نرجسي ولا.. المنحرف النرجسي عادة يكون مللول يعيشك في الاحلام الوردية .. هذا لا عادي ملول .. اول مرة قالي كلام خايب في التليفون ما صدقتش وذنيا عمري لا حد قلي هكاكة ولا فما حاجة صارت تستحق نسمع كفر و كلام زايد هكاكة .. يحبني ليه وحدو .. تقلبت الدنيا برشا مرات على خرجة مع صاحبتي .. ما يقُليش ما تخرجش اما يفركس اتفه الاسباب مالحيط باش يعارك عليها .. مزاجو يتقلب كل لحضة يعايرني باي حاجة تافهة نحكيها حتى نبزة من عند صاحبتي يجبدها في عركة يقلي حتى صحباتك ما يحبوكش .. في اول العلاقة شاف ميساجات متاع صديق قديم ليا قالي توحشتك فيه المساج و الطفل كي خويا حتى كلمة توحشتك كانت عادية بين زوز صحاب … قلبها الدنيا عليها رغم اللي شاف الميساجات الكل حتى الي من قبل ما نولي معاه ما فيهم شي غير زوز صحاب.. قعد شاددها لين قصيت علاقتي معاه الطفل .. قعد بعدها يشك فيا حتى بعد عام على الفازة هذيكا.. كل سبان يقولو، يتحجج و يقلي انا ملي شفت طفل يقلك توحشتك ما نسيتهاش.. رام الي هي اول العلاقة و كان ينجم كي هي اثرت فيه للدرجة هاذي يقصها معايا .. كينتعارك معاه نسمع كلام ما يتقالش للعدو .. بعد يقلي ما نقصدش انا وقتها نحب نوجعك باي طريقة كهو .. يطلب السماح، يبكي.. بعد ما يطلب السماح يحس روحو ديما طيح قدرو و هبط من خشمو .. مغروم بروحو لين وليت معاه نحسو هو خير مني .. حتى تفدليك ما يقبلش على روحو.. بعد السبان ولا ضرب.. بدات بدزّة ولات كفوف، بعد ولات زروقية في لحمي معادش تتنحى.. بعد ولا ضرب في الشارع .. على اسباب تافهة عللخر ضربني في الشارع خاطر سبني على سبب تافه ما نتفكروش تغششت مشيت و خليتو خلط عليا ضربني على وجهي دم من شفتي يقطر خاطر مشيت و خليتو انا ساكتة .. اللي يقرى توا في الكلام هذا يقول في مخو علاه ما خذيتش موقف ؟ شبيك ما بعدتش ؟ فاش تستنى؟ اسئلة ما نعرفلهاش جواب .. حبيتو برشا حليت عينيا فيه.. كل مرة يطلب سماح … السنا كملنا ماستار مع بعضنا عامين معاه تعداو بكا على اتفه حاجة وليت نتسب نتضرب .. مرة قللي انا نضرب خاطر تضربت برشا من عايلتي في الصغرة .. يقلي انتي قبيحة خاطر في وسط العرك نقلو تكذب .. كلمة تكذب قباحة و الكلام الزايد و التربريب و كل نرمال .. راني calme و ما عنديش الزايد في شي كان هو تقريبا اللول في حياتي ! كلام ما نجم نحكيه لحد حكايه ما يعرفها حد و ما تتحكاش .. الحل نعرفو: لازم نبعد عليه ما فيهاش نقاش حاولت بالطرق الكل نتعامل معاه ستحملت كل شي لين نحس في روحي بديت نطفى و بديت نوفى ما فهمتش منحرف نرجسي ولا من آثار الزطلة اللي ما يبطلهاش ؟