حكايتي مع توأم روحي

باهي، باش نبدى ونقول عندي مشكلة .. ممكن الناس ما تشوفهاش مشكلة ولا انا ما مشوفهاش مشكلة ونحسها صغيرة كيف نشوف مشاكل العباد.. الناس الكل حبت و تحبت في حياتها و انا وحدة مالناس هاذوكا .. كنت نقرى في الكولاج كان عندي طفل صديقي إلّي ديما نتعارك معاه كيف نجيب انا اكثر منو بنكتة في المعدل ولا هو .. كانت في الصغرة علاقة متاع زوز صغار صحاب و محلاها.. و فاو 3 سنين كولاج بعد في الليسي كل حد في كلاس و وكل حد شد ثنية .. رجعت نقرى معاه في الباك .. اول نهار دخل فيه للقسم كيف غزرتلو ما خممتش مرتين حبيتو طول .. قعدت نثبت في التفاصيل كيفاه كبر و زيان و محلاه.. رجعت نفس العلاقة متاع الصغرة بيناتنا اما حب كنت نحس في وحدي .. كان عنا نفس الذكريات متاع 3 سنين الصغرة صحابنا نفسهم كل شي.. حبينا بعضنا.. و عشنا كيما عاشت الناس الكل في علاقات الحب .. هاك دموع الفرحة كي قالي نحبك، كالحشمة متاع قلبك بش ياقف، سهرة للصباح نقراو في كتاب نحبوه، حديث بالسوايع في قهوة على tableau نحبوه، شعر وكتيبة، موزيكا ليل ونهار نحبوها كان عنا نفس الذوق في كل شي تقريبا… كانت ماشية من غير حتى غلطة ولا عركة (الي هي حاجة مش عادية) كثر التفاهم حسيت روحي ولا آمنت الي انا لقيت شطري في الدنيا.. الانسان ولا الروح اللي خلقها ربي على خاطري في الدنيا بش تكون نصي تكملني .. بعد عام و شويه صار نقاش … اول مرة في حياتنا مع بعضنا نتخالفو في لحضة ماللحضات قصيتها معاه .. ماشي في بالي عادي كيما اي زوز يتعاركو ولي بيناتنا ما عمرو ما يوفى بكلمتين مع العلم لا طاح قدر لا تعاركنالا صار شي كنا ملول صحاب اي اما قدر كبير بيناتنا… و قد ما نحكي قداه حبني و قداه كان باهي معايا ما نجمش نوصف.. بعدها تقصت بالجّد … سكرها عليا مالشيرات الكل بعد ليلة هذيكا… ولا حجرة قالي الحليب كيف يتكب معادش يتلم … بدل ثنيتو،الحجامة، صحابي اللي هوما صحابو، و كل شي كنت نحبو و يفكرو فيا حتى اللون اللي يحبو معادش يلبس كان اكحل تقول فيلم الفازة هذي اما بالرسمي واللهي بش نقول اللي هو حساس برشا و كيف يحس برشا و يتوجع ينزل على روحو يخدم صحة الراس حبني برشا و كي قتلو هكاكة خذاها مني باكثر مالجد.. حاولت نحكي معاه، حاولت نقول اللي انا ما نقصدش نقصها … لحضة غش.. منغير حتى كلام آخر ولا حتى تبرير ولا حتى خسر عليا قالي راك وجعتني… كهو … وفات.. العبد الي كان السند، الخو، الصاحب، الحبيب مشا في ليلة و نهار و بجد ليلة و نهار.. وقتها عمري 21 توا عمري 27 عشتهم الدقيقة بأعوام.. بعدها الدنيا في عينيا تبدلت نحس في روحي كبرت 30 سنا كملت قريت تخرجتْ حياتي ما وقفتش … حياتي العاطفية وقفت … بعدو عملت علاقة ولا زوز في كل مرة نحسها مش ماشية مني انا .. ديما مش هذا اللي حاشتي بيه بعد ما ريت العلاقة كيفاه كانت مثالية بالنسبة ليا .. ماعاد حسيت حتى علاقة ناجحة … هو نستو اما العلاقة واحلة في مخي .. عمري قاعد يتعدى نشوف فيه بالدقيقة نعيش فيه، ضعت في مشاعري … صحابي دارنا خواتي يقولو: "تحاوز معادش بش يجيك الاحساس هذاكاولا يتعاود اللي حسيتو ..ابني حياتك مع حد يحبك اللي يحبك خير ملي تحبو … ماشية في ثنية متاع بش تقعد وحدك… " ما نعرفش شنعمل نخاف نبني حياتي نع حد اخر نندم نخاف من برشا حاجات … هو عمرو لاهو بش يرجع و لا انا عاد نحب يرجع خاطر توجعت برشاكيفاه عمل.. نحب نتجاوز و نرجع كيما كنت قبل… منعرفش شنعمل؟